Jun 04 2026 | २०८३, जेठ २१ गते
Jun 04 2026 | २०८३, जेठ २१ गते
काठमाडौँ । दाङको तुलसीपुर उप–महानगरपालिका–५ स्थित बिरेन्द्र चोकमा भएको झण्डा जलाउने घटनामा संलग्न एक जनालाई प्रहरीले पक्राउ गरेको छ ।
विहिबार राति राष्ट्रिय स्वतन्त्र पार्टीका सभापति रवि लामिछाने सुर्खेतबाट दाङको घोराही आउने क्रममा आयोजित स्वागत कार्यक्रममा भीडभाडका बीच केही अपरिचित व्यक्तिहरूले नेकपा एमालेको चुनाव चिन्ह अंकित झण्डा जलाएको भिडियो सामाजिक सञ्जालमार्फत सार्वजनिक भएको घटनामा प्रहरीले एक जनालाई पक्राउ गरेको हो ।
जिल्ला प्रहरी दाङका सूचना अधिकारी प्रहरी नायब उपरीक्षक रेशम वोहराका अनुसार सो घटनामा संलग्न रहेका तुलसीपुर उप–महानगरपालिका–७ कालाखोला निवासी ५५ वर्षीय बुद्धि बहादुर बस्नेतलाई शुक्रबार नियन्त्रणमा लिइएको छ । पक्राउ परेका बस्नेतमाथि थप अनुसन्धान भइरहेको प्रहरीले जानकारी दिएको छ ।
यस घटनामा संलग्न अन्य व्यक्तिहरूको खोजी कार्य जारी रहेको बताउँदै जिल्ला प्रहरी कार्यालय दाङले समाजमा शान्ति–सुरक्षा र सामाजिक सद्भावमा खलल पुर्याउने यस्ता गतिविधि नगर्न सबैलाई आग्रह गरेको छ । साथै, सम्पूर्ण सरोकारवाला पक्षलाई संयमित र जिम्मेवार बन्न समेत अनुरोध गरिएको छ ।
© 2026 All right reserved to onlinepatrika.com | Site By : Sobij
© 2026 All right reserved to onlinepatrika.com | Site By : Sobij
