काठमाडौं । मध्यपूर्वमा जारी इरान युद्ध चौथो हप्तामा प्रवेश गर्दा अमेरिकी सैनिकहरू अस्थायी रूपमा होटल तथा कार्यालय भवनहरूमा बस्न बाध्य भएका छन् । न्यूयोर्क टाइम्सले उद्धृत गरेका अमेरिकी अधिकारीहरूका अनुसार, इरानले अमेरिकी-इजरायली युद्धको प्रतिशोधस्वरूप अमेरिकी सैन्य बेसहरूमा गरेको बमबारीपछि सैनिकहरूलाई वैकल्पिक स्थानमा सारिएको हो।

अमेरिकी स्थल सेनाले टाढाबाट युद्ध सञ्चालन गरिरहेको बताइएको छ। तर लडाकु पाइलट तथा युद्धविमान सञ्चालन गर्ने टोलीहरू भने प्रत्यक्ष रूपमा आक्रमणमा संलग्न छन्। इरानको इस्लामिक रिभोल्युशनरी गार्ड्स कोर्प्स (आइआरजीसी) ले सैनिकहरूको नयाँ स्थानबारे जनतालाई जानकारी दिन आग्रह गरेको छ।

अमेरिकी रक्षा मन्त्रालयका अधिकारीहरूले भने यो खतराले पेन्टागनलाई युद्ध जारी राख्नबाट रोक्न नसकेको बताएका छन् । युद्ध फेब्रुअरीको अन्त्यतिर संयुक्त अमेरिकी-इजरायली हवाई आक्रमणमा सर्वोच्च नेता आयातुल्लाह अली खामेनीको हत्या भएपछि सुरु भएको हो।

रक्षा मन्त्री पिट हेगसेथले पेन्टागनमा आयोजित मासिक धार्मिक कार्यक्रममा अमेरिकी सैनिकहरूको सफलताको लागि प्रार्थना गर्दै युद्धलाई निरन्तरता दिने संकेत गरेका छन्।

तर सैनिकहरूलाई अस्थायी स्थानमा सारिएको घटनाले ट्रम्प प्रशासनको युद्ध तयारीबारे प्रश्न उठाएको न्यूयोर्क टाइम्सले उल्लेख गरेको छ । अमेरिकी अधिकारीहरूले इरानले अझै केही सैन्य क्षमता कायम राखेको स्वीकार गरेका छन्।

इरानी अधिकारीहरूले अमेरिकी सैनिकहरूलाई होटलमा राखेर नागरिकलाई मानव ढालको रूपमा प्रयोग गरेको आरोप लगाएका छन् । इरानी सैन्य प्रवक्ता लेफ्टिनेन्ट कर्नल इब्राहिम जोल्फाघारीले अमेरिकी सैनिकहरू बेस बाहिर लुकाइएका स्थानहरूमा आश्रय लिएको दाबी गर्दै जनतालाई उनीहरूको स्थान रिपोर्ट गर्न आग्रह गरेका छन्।

तेहरानले अमेरिकी-इजरायली आक्रमणको प्रतिशोधमा अमेरिकी बेस मात्र नभई दूतावास तथा तेल-ग्यास संरचनाहरूलाई पनि निशाना बनाएको छ। सयौं ड्रोन तथा मिसाइल प्रक्षेपण गरेर होर्मुजको सामुद्रिक मार्गलाई बन्दजस्तै बनाइएको छ।

यसबीच, राष्ट्रपति डोनाल्ड ट्रम्पले इरानसँग वार्ता सुरु भएको दाबी गरेका छन् । पाकिस्तान सम्भावित मध्यस्थका रूपमा अगाडि आएको छ । तर इरानले कुनै वार्ता नभएको बताएको छ। इरानी प्रवक्ता जोल्फाघारीले ट्रम्पलाई व्यंग्य गर्दै “तपाईं आफ्नैसँग वार्ता गर्दै हुनुहुन्छ” भनेका छन्।

इरानी पत्रिकाहरूले ट्रम्पलाई “पिनोचियो” शैलीमा कार्टून बनाएर वार्ताबारेको उनको दाबीलाई झूट भनेका छन्। तेल मूल्य बढिरहेको अवस्थामा ट्रम्पले बजारलाई शान्त पार्न झूट बोलेको आरोप लगाइएको छ।

यसैबीच, सीबीएस न्युजका अनुसार पेन्टागनले ८२औं एयरबोर्न डिभिजनका सैनिकहरूलाई मध्यपूर्वमा पठाउने तयारी गरेको छ। करिब १,५०० भन्दा कम सैनिक पठाइने अनुमान गरिएको छ। तिनीहरू हजारौं मरीनसँग मिलेर मध्यपूर्वमा पुग्नेछन्।

८२औं एयरबोर्न डिभिजन विश्वभर १८ घण्टाभित्र पठाउन सकिने क्षमता राख्छ र “बलपूर्वक प्याराजम्प आक्रमण” मा विशेषज्ञ मानिन्छ । वाल स्ट्रिट जर्नलका अनुसार, यस तैनाथीले राष्ट्रपति ट्रम्पलाई होर्मुजको सामुद्रिक मार्ग पुनः खोल्ने वा इरानका सामरिक टापु तथा तट कब्जा गर्ने अवसर दिन सक्छ।