Jul 10 2025 | २०८२, असार २६ गते
Jul 10 2025 | २०८२, असार २६ गते
ललितपुर । ललितपुर महानगरपालिका–२८ स्थित हरिसिद्धिमा मध्यराति नकावधारी समूहले घरमा प्रवेश गरी सुनका गहना र नगद लुटपाट गरेका छन् । असार २२ गते राति १ बजेतिर हरिसिद्धिस्थित होसना इँट्टाभट्टा नजिकै रहेको ५० वर्षीया रजनी महर्जनको एकतले घरमा नकाब लगाएका चार जना युवाले कौसीको ढोका फोडेर प्रवेश गरेका थिए ।
घरमा रजनी महर्जन र उनकी ३० वर्षीया छोरी रविना महर्जन मात्र रहेका बेला लुटपाट भएको हो । उनीहरूले धारिलो हतियार देखाई डरत्रास देखाउँदै करिब ५० हजार रुपैयाँ नगद र एक तोला सुनका गहना लुटेर फरार भएको पीडित परिवारले जनाएको छ ।
 (1).gif)
लुटिएको गहनामा एक जोर सुनको टप र एक थान तिलहरी रहेको बताइएको छ । घटनाको जानकारी पाएपछि राति २ बजेर १० मिनेटमा प्रहरी प्रभाग हरिसिद्धीको टोली घटनास्थलमा पुगेको जिल्ला प्रहरी परिसर ललितपुरका प्रमुख एसपी चक्रराज जोशीले जानकारी दिए ।
जोशीका अनुसार घटनामा संलग्न आशंकामा चार जनालाई नियन्त्रणमा लिएर सोधपुछ तथा निगरानी गरिँदैछ ।
© 2025 All right reserved to onlinepatrika.com | Site By : Sobij
© 2025 All right reserved to onlinepatrika.com | Site By : Sobij
