Jun 04 2026 | २०८३, जेठ २१ गते
Jun 04 2026 | २०८३, जेठ २१ गते
काठमाडौं । इरानमा छात्राहरूको विद्यालयमा भएको मिसाइल हमलाको अनुसन्धान संयुक्त राष्ट्रसंघले सुरु गरेको समितिका एक सदस्यले समाचार एजेन्सी ‘रोयटर्स' लाई जानकारी दिएका छन् ।
इरानको मिनाब सहरस्थित ‘शारजारेह तय्येबेह’ विद्यालयमा एकपछि अर्को गरी दुईवटा मिसाइल प्रहार गरिएको थियो । इरानी अधिकारीहरूले सोमबार जेनेभामा दिएको जानकारीअनुसार यस हमलामा १६८ छात्राहरूको मृत्यु भएको थियो ।
यसअघि धेरै सञ्चारमाध्यमहरूले यस हमलाका लागि अमेरिकालाई जिम्मेवार ठहराएका थिए । यद्यपि, यस मामिलामा हालसम्म विस्तृत अनुसन्धान भएको छैन ।
अमेरिकी रक्षा विभागले पनि यस हमलाको अनुसन्धानको दायरा बढाएको छ । संयुक्त राष्ट्रसंघको इरानसम्बन्धी ‘फ्याक्ट फाइन्डिङ मिसन’ का सदस्य माक्स दू प्लेसिसले जेनेभामा आयोजित पत्रकार सम्मेलनका क्रममा भने, “हामी अहिले अनुसन्धानको प्रारम्भिक चरणमा छौँ ।” उनले इरानले बताएको मृतक संख्यालाई पुष्टि गर्ने भरपर्दो रिपोर्टहरूको पनि उल्लेख गरे।
प्लेसिसले भने, “यस प्रकारको घटनाको सन्दर्भमा निर्दोष मानिसहरूको मृत्यु भएको अवस्थालाई ध्यानमा राख्दै स्वतन्त्र निष्कर्षमा पुग्न सकियोस् भन्नेका लागि यस्तो अनुसन्धान अत्यन्त आवश्यक छ ।”
यदि यो हमलामा अमेरिकी पक्षको गल्ती पुष्टि भएमा, यो मध्यपूर्वमा विगत धेरै दशकयता सैन्य कारबाहीका क्रममा निर्दोष मानिसहरूको ज्यान गएको सबैभन्दा भयावह घटनामध्ये एक हुन सक्ने बताइएको छ ।
© 2026 All right reserved to onlinepatrika.com | Site By : Sobij
© 2026 All right reserved to onlinepatrika.com | Site By : Sobij
